पाच वर्षीय बालिकेवर अत्याचार करून खुन करणा-यास १० हजार दंड

भिवंडी(प्रतिनिधी):- भिवंडी तालुक्यातील सरवली पाडा परिसरातील राहणा-या एका ५ वर्षीय सख्ख्या चुलत बहीणीवर शारिरीक अत्याचार करून खून केल्याप्रकरणी १३ वर्षीय चुलत भावाला बाल न्यायालयाने १० हजार रूपये दंडाची शिक्षा ठोठावली. दिवाळी सणासाठी फटाक्यांचे आमिष दाखवून पीडीतेवर आरोपीने अत्याचार केला होता. पोलिसांनी सदर मुलास ताब्यात घेऊन कारवाई केली होती. _भिवंडी तालुक्यातील सरवली पाडा येथील एमआयडीसीमध्ये एक कुटूंब मोलमजूरी करून उदरनिर्वाह चालवतात. त्यांची पाच वर्षीय मुलगी २८ ऑक्टोबर २०१९ रोजी घराबाहेर खेळत असताना अचानक बेपत्ता झाली होती. सर्वत्र शोध घेतला असता सरवली पाडा येथील पाईपलाईन लगतच्या झुडूपात तिचा मृतदेह आढळून आला होता. घटनेची माहिती मिळताच भिवंडी पोलिस उपायुक्त राजकुमार शिंदे, वरिष्ठ पोलिस निरिक्षक रमेश काटकर, पोलिस निरिक्षक (गुन्हे) संजय साबळे यांच्या पथकाने घटनास्थळी धाव घेऊन पंचनामा करून मृतदेह उत्तरीय तपासणीसाठी भिवंडी शहरातील स्व. इंदिरा गांधी उपजिल्हा रूग्णालयात पाठवण्यात आला होता. वैद्यकिय अहवालानुसार चिमुरडीवर बलात्कार करून तिचा गळा आवळून खून केल्याचे निष्पन्न झाले होते. याप्रकरणी कोनगाव पोलिसांनी अज्ञात आरोपींच्या विरोधात भादंवि. ३६४, ३०२, २०२, ३६४, ३६६(अ), ३७६ सह लैंगिक अपराधापासून बालसंरक्षण अधिनियम २०१२ चे कलम ४,८,९(ह) १० प्रमाणे गुन्हा दाखल केला होता. या प्रकरणाचा पोलिसांनी जलदगतीने तपास करून अवघ्या २४ तासात पीडीतेच्या सख्ख्या चुलत भावाला संशयीत आरोपी म्हणून ताब्यात घेतले होते. चौकशीअंती हा गुन्हा केल्याची कबुली दिली. त्यामुळे बाल न्यायालयात हजर केले असता त्याची रवानगी भिवंडी येथील बालसुधारगृहात करण्यात आली. त्यानंतर वरिष्ठ पोलिस निरिक्षक रमेश काटकर यांच्या पथकाने बाल न्यायालयात ५० दिवसांत दोषारोपपत्र सादर केले. यावर बाल न्यायालयात अंतिम सुनावणी होऊन १३ वर्षीय विधी संघर्ष आरोपीला १० हजार रूपये दंडाची शिक्षा ठोठावण्यात आली. पोलिसांनी या प्रकरणी नोंद घेतली आहे.